Víkari.is - Fréttavefur Bolvíkinga
Fréttir | 25.9.2018 16:54:27 |
Ívar með keppendur á Special Olympics

Íþróttafélagið Ívar verður með keppendur á heimsleikum Special Olympics í Abu Dhabi í mars 2019.

 

Heimsleikar Special Olympics fara fram í Abu Dabi dagana 14. til 21. mars 2019. Íþróttasamband fatlaðra og Special Olympics á Íslandi senda 38 keppendur til þátttöku í 9 íþróttagreinum, badminton, boccia, áhalda og nútímafimleikum,  frjálsum íþróttum, golfi, lyftingum, knattspyrnu og sundi. 

 

Í þessum hópi verða tveir strákar frá Bolungarvík sem keppa í badminton. Þorsteinn Goði Einarsson mun keppa í einstaklingskeppni í badminton og Guðmundur Kristinn Jónasson keppir síðan með honum í Unified tvíliðaleik en þar keppa fatlaðir og ófatlaðir saman. Með þeim fer þjálfari þeirra Jónas L. Sigursteinsson. 

 

Áætlað er að leikarnir verði stærsti íþróttaviðburður heims árið 2019, 7000 keppendur auk þjálfara og aðstoðarfólks. Forsvarsmaður Special Olympics samtakanna er Timothy Kennedy Shriver. Samtökin standa að íþróttastarfi fyrir fólk með þroskahömlun og/eða sérþarfir og markmið er að allir eigi sömu möguleika á sigri. Raðað er í úrslitariðla eftir styrkleikastigi og allir keppa við sína jafningja.  Margir stíga í fyrsta skipti á verðlaunapall á leikum Special Olympics og þar hafa einstaklingar blómstrað á eigin verðleikum. Auk íþróttastarfs hafa samtökin lagt  áherslu á önnur verkefni sem skapa aukin lífsgæði, s.s. heilbrigði- og menntun. 

 

Þorsteinn Goði æfir badminton 2-3x í viku með Íþróttafélaginu Ívari ásamt 2 öðrum strákum. Guðmundur kom síðan inn í þetta verkefni síðasta vetur og æfir nú með Þorsteini og verður félagi hans í Unified flokknum á leikunum. 

 

Kostnaður Íþróttafélagsins Ívars vegna þáttöku á Special Olympics er um 400.000 kr. og munu strákarnir á næstu dögum ganga í fyrirtæki og selja penna til styrktar ferðarinnar en einnig eru frjáls framlög frá fyrirtækjum og einstaklingum vel þegin, reikningsnúmer félagsins er: 0154-05-001632, kt. 430596-3069. 


Myndbandið
Næstu viðburðir
Ekkert fannst!
Nýjustu myndirnar
Smelltu til að skoða Vígsla snjóflóðagarðanna
Snjóflóðavarnargarðarnir Vörður og Vaki í Bolungarvík voru vígðir laugardaginn 20. september.