Víkari.is

Góð aðsókn hefur verið að tjaldsvæðinu við íþróttamiðstöðina Árbæ í Bolungarvík það sem af er þessu sumri miðað við fyrri ár en um miðjan júlí höfðu verið seldar um 320 gistinætur frá byrjun júní. Í ár hefur þjónusta við gesti tjaldsvæðisins verið aukin enn frekar, m.a. með aukni eftirliti með svæðinu og lengri opnunartíma í íþróttamiðstöðinni. Gunnar Hallsson, forstöðumaður íþróttamiðstöðvarinnar Árbæjar telur að tjaldsvæði Bolvíkinga eigi mikla möguleika á að draga til sín enn fleiri dvalargesti. Bæði er það staðsetning tjaldsvæðisins í þéttbýli við hliðina á sundlauginni og einnig að tjaldsvæðið er í göngufæri við þjónustu eins og verslun, banka, heilsugæslu, söfn, kaffihús, pöbba og fleira. Og þrátt fyrir þessa augljósu kosti geta gestir tjaldsvæðisins verið útaf fyrir sig á svæðinu fyrir innan íþróttamiðstöðina í jaðri byggðarinnar.