Víkari.is

Góðir Bolvíkingar.

Nú þegar komið er að lokum kosningabaráttunnar viljum við nota tækifærið og þakka bæjarbúum gott samstarf á kjörtímabilinu, með von um að það góða samstarf geti haldið áfram á því næsta.

Óhætt er að fullyrða að erfiðasta verkefni þessa kjörtímabils hefur verið að koma fjármálum bæjarins í gott horf aftur. Það hefur tekist með sameiginlegu átaki bæjaryfirvalda og bæjarbúa. Við höfum snúið vörn í sókn.

Tímabundið álag á útsvar og mikil hagræðing í rekstri hefur ekki verið sársaukalaus fyrir íbúa Bolungarvíkur. Áframhaldandi skuldasöfnun var á hinn bóginn ekki valkostur, það varð að bregðast við.

Við höfum átt gott og árangursríkt samstarf við Eftirlitsnefnd með fjármálum sveitarfélaga. En við urðum að undirgangast ströng skilyrði. Við þurftum m.a. að hagræða um sem svarar meira en 2 milljónum króna á hverri viku. Án þessarar hagræðingar hefði hvorki verið hægt að fá niðurfellingar á skuldum né sérstök framlög frá Jöfnunarsjóði.

D-listi Sjálfstæðismanna og óháðra hefur á undanförnum vikum unnið stefnuskrá í góðri samvinnu við kjósendur á fjölmennum fundum. Stefnuskráin hefur verið birt og send í öll hús bæjarins til kynningar.

Framundan eru mörg og krefjandi verkefni að fást við. Við erum reiðubúin til að vinna áfram af alefli að málefnum Bolungarvíkur og bera ábyrgð á rekstri bæjarins.

Í kosningunum á morgun stefnum við að því að fá kjörna 4 bæjarfulltrúa. Í 4. sæti listans situr Baldur Smári Einarsson. Óhætt er að fullyrða að bæjarstjórn Bolungarvíkur er sterkari með Baldur Smára innan borðs.

Til að tryggja það, þurfum við að setja X við D á kjördag.

Bolungarvík 28. maí 2010
Frambjóðendur D-lista Sjálfstæðismanna og óháðra