Í sumar verður opnuð kærkomin viðbót við sundlaugargarðinn í íþróttamiðstöðinni Árbæ í Bolungarvík. Um er að ræða nýja vaðlaug eða fjölskyldupott, sem kemur í stað "kalda" pottsins sem sundlaugargestir í Bolungarvík hafa þekkt í gegnum tíðina. Nýja vaðlaugin verður volg og nógu grunn til að yngstu sundlaugargestirnir geti notið sín sem best.

Framkvæmdir eru nú hafnar við vaðlaugina en það er GÓK húsasmíði ehf sem vinnur að smíði hennar. Heildarkostnaður við verkið er áætlaður um 6,7 milljónir króna og er reiknað með að vaðlaugin verði komin í notkun í júní. 

Línubáturinn Sirrý ÍS frá Bolungarvík hefur fiskað einstaklega vel síðustu daga og kom báturinn með 16,2 tonna afla að landi í dag. Er þetta einn mesti afli sem smábátur hefur komið með að landi úr einni veiðiferð en þó er ekki um aflamet að ræða. Nær allur aflinn í þessum róðri var steinbítur sem fékkst á miðunum út af Skálavík. Skipstjóri í dag var Snorri Harðarson en Jóhann Kristjánsson var háseti.  Aflinn hjá Sirrý það sem af er maí er kominn í 104,6 tonn, þar af er aflinn í síðustu 7 róðrum 69 tonn eða um 10 tonn að jafnaði í róðri.

Meðfylgjandi myndir voru teknar þegar Sirrý ÍS kom að landi í Bolungarvík síðdegis í dag en það var Einar Jón Snorrason sem tók myndirnar.

Á aðalfundi Háskólaseturs Vestfjarða, sem fram fór föstudaginn 17. maí, var skrifað undir nýjan samstarfssamning á milli Háskólaseturs Vestfjarða og Háskólans á Akureyri um  meistaranámið í haf- og strandsvæðastjórnun. Auk áframhaldandi samstarfs um meistaranámið í haf- og strandsvæðsastjórnun felur samningurinn einnig í sér samstarf stofnanna tveggja um nýtt meistaranám, Sjávartengda nýsköpun.

Sjávartengd nýsköpun er nokkuð nýstárleg námsleið enda er hér um að ræða hagnýtt meistaranám sem boðið er upp á í nánu samstarfi við Háskólann á Akureyri og Nýsköpunarmiðstöð Íslands. Námið miðar að því að nemendur skapi sér sín eigin atvinnutækifæri í gegnum nýsköpunarhugmynd sem þeir þróa í náminu. Í því sambandi er lögð ...