Þá er komið að síðustu ferð bolvískra 10. bekkinga á erlenda grund í tengslum við Comenius samstarfsverkefni skólans. Að þessu sinni eru það þau Hermann Andri Smelt, Ingólfur Daði Guðvarðarson og Sigríður Magnea Jónsdóttir sem hafa lagt land undir fót og eru nú stödd í Luxemborg. Viðfangsefni verkefnisins er eins og við höfum áður sagt frá er sanngjörn viðskipti, FAIR TRADE, þar sem fjallað er um viðfangsefnið frá ólíkum hliðum. Að undanförnu hafa nemendur verið að fjalla um peninga og gildi þeirra, “Money and it´s value”. Eru peningar lykilatriði í samfélaginu? Getum verið mögulega verið án þeirra? Hvernig hafa viðskipti þróast? Hver eru lykilgildin í samfélaginu? Hvernig munu viðskiptahættir nemenda verða í framtíðinni? Munu peningar, mynt og seðlar, renna sitt skeið og rafræn viðskipti taka alveg yfir? Spurningum eins og þessum hafa nemendur verið að velta fyrir sér og munu þau Hermann, Sigríður og Ingólfur flytja fyrirlestur um sínar hugmyndir í Luxemborg. Nemendur áttu einnig að hanna fatnað/skrautmuni úr endurunnu efni og munu þeir taka þátt í tískusýningu þar sem framleiðslan verður sýnd. Sigríður munu sýna kjól sem skreyttur er með Kit kat bréfum og Hermann og Ingólfur sýna bindi og slaufu í sama stíl. Skólinn sem nemendur dvelja í í Luxemborg er um 1600 nemenda stúlknaskóli sem stýrt er af nunnum.