Víkari.is - Fréttavefur Bolvíkinga
Menning og mannlíf | 9.2.2018 21:05:32 |
Leikhópurinn Lotta sýnir Galdrakarlinn í Oz

Leikhópurinn Lotta er landsmönnum að góðu kunnur en síðastliðin ellefu sumur hefur hópurinn ferðast með útileiksýningar út um allt land. Á hverju ári setur hópurinn upp nýjar sýningar, sýningar sem allar hafa slegið í gegn og eru enn spilaðar af geislaplötum á fjöldamörgum heimilum. Núna hefur Lottan ákveðið að dusta rykið af þessum gömlu sýningum og endurvekja þær, 10 árum síðar og nú innandyra. Leikhópurinn byrjar á byrjuninni, á Galdrakarlinum í Oz sem er fyrsta verkið sem sérstaklega var skrifað fyrir Lottu.

 

Galdrakarlinn í Oz verður sýndur í Edinborgarhúsinu á Ísafirði á morgun laugardaginn 10. febrúar og hefst sýningin kl. 16:00.

 

Flestir þekkja söguna af ævintýralegu ferðalagi Kansasstúlkunnar Dórótheu og Tótó, hundinum hennar, til ævintýralandsins Oz. Þar kynnist hún heilalausu Fuglahræðunni, hjartalausa Pjáturkarlinum og huglausa Ljóninu auk þess sem hún lendir í klóm vondu Vestannornarinnar. Dóróthea og vinir hennar lenda í allskyns hremmingum og þurfa að leita á náðir Galdrakarlsins ógurlega í Oz. Spurningin er núna hvort Galdrakarlinn getur hjálpað Dórótheu að komast aftur heim til sín og vinum hennar að fá það sem þá svo sárlega vantar.

 

Eins og áður segir verður Galdrakarlinn í Oz sýndur í Edinborgarhúsinu á Ísafirði laugardaginn 10. febrúar kl. 16:00 og er miðaverð kr. 2.900.


Myndbandið
Næstu viðburðir
Ekkert fannst!
Nýjustu myndirnar