Víkari.is

Deildarstjóri tjónadeildar TM segir að tryggingafélög bæti aðeins raunveruleg tjón og það sé ekki við tryggingafélög að sakast sé brunabótamat húseigna ekki rétt. Því sé mjög áríðandi að húseigendur fylgist vel með mati húseigna sinna. Í morgun var birt á bb.is frétt Fréttablaðsins þess efnis að Tryggingamiðstöðin hf. neitaði að greiða Bergi Karlssyni brunabótamat húseignar hans sem brann í Bolungarvík fyrir skömmu. Í fréttinni kom fram að þrátt fyrir að húsið hafi verið að brunabótamati 30 milljónir króna vildi TM einungis greiða 6,4 milljónir króna í tryggingarbætur. Hjámar Sigurþórsson, deildarstjóri tjónadeildar TM , segir í samtali við bb.is að þarna sé um að ræða hús sem byggt var 1915 og þegar komi að virðingu tjóns eftir bruna þá beri tryggingafélaginu lögum samkvæmt að taka tillit til ástands hússins sem tjón verður á. Þetta er sama og með bílinn. Ef þú missir bílinn þinn þá færðu bætur sem nema sambærilegum bíl í staðinn. Þú færð ekki lakari bíl og þú færð heldur ekki betri bíl. Ef bíllinn sem þú tapar er 100 þúsund króna virði þá færðu ekki bíl fyrir fjórar milljónir í staðinn, sagði Hjálmar. Aðspurður hvers vegna Bergur var látinn greiða tryggingar af 30 milljóna króna brunabótamati árum saman sem ekki hafi svo fengist staðist segir Hjálmar að þar komi að þætti Fasteignamats ríkisins. Það hefur lögum samkvæmt það hlutverk að gera brunabótamat fyrir allar fasteignir í landinu og við komum ekkert að því máli. Það er á ábyrgð húseiganda hverju sinni að ganga eftir því að brunabótamat húseignar sé í samræmi við raunvirði hverju sinni. Það er ekki hlutverk tryggingafélagsins. En hvernig tryggingafélag getur metið hús sem brunnið hefur til grunna segir Hjálmar að í umræddu tilfelli liggi fyrir upplýsingar um húsið m.a. myndir og fleira sem geri matið mögulegt. Megin málið sé að tryggingar bæti raunverulegt tjón og þeir sem fyrir tjóni verða eigi að vera eins settir eftir tjón. Menn eigi ekki að hagnast fjárhagslega á tjónum. Um hvað gerist ef hús eru of lágt metin segir Hjálmar að þá sé aðeins greidd vátryggingarupphæðin. Aldrei séu greiddar hærri bætur en tryggt er fyrir. Hafi fólk áhyggur af því að of lágt metnar sé hægur vandi að kaupa viðbótartryggingu. Því sé mjög mikilvægt að fólk fylgist vel með brunabótamati húseigna sinna hverju sinni og það mat endurspegli raunverulegt ástand og verðmæti hússins. Frétt tekin af bb.is