.jpg)
Á fundi bæjarstjórnar 4. mars sl. ræddi bæjarstjórn fræðslumál. Rætt var um skýrslu R-3 ráðgjafar þar sem gerð var úttekt á hagkvæmni þess að sameina eða færa undir eina yfirstjórn, skólastigin þrjú í Bolungarvík, þ.e. grunnskólann, tónlistarskólann og leikskólann. Þá voru ræddir fundir sem bæjarráð átti með fulltrúum fræðslumálaráðs og skólastjórnendum allra skólanna. Bæjarstjórn bókaði eftirfarandi af þessu tilefni:
„Ekki verður lagt til að skólastigin þrjú í Bolungarvík verði sameinuð, þar sem hagræðing af sameiningu yrði einungis um 3 m.kr á ári miðað við að ítrustu hagræðingu verði náð. Ein af forsendum sameiningar væri að skólastjórnendur væru henni hlynntir og teldu hana bæta þjónustu við nemendur og foreldra og / eða gæði kennslunnar. Skólastjórnendur hafa allir lýst sig fremur andvíga sameiningu skólastiganna.
Stefnt skal að því að leikskólinn verði rekinn á einum stað en ekki á tveimur eins og nú er raunin. Samkvæmt skýrslu sem unnin er af R3 ráðgjöf væri hægt að mæta núverandi þörf með því að byggja við leikskólann í Hlíðarstræti eða færa alla starfsemina í Lambhaga og byggja við þar. Þá eru nefndir fleiri valkostir í stöðunni sem ekki hafa hlotið jafn góðan hljómgrunn. Ef miðað er við óbreyttan fjölda barna í leikskóla eða um 50 börn þá er niðurstaðan samkvæmt skýrslunni að valkostirnir séu jafndýrir, þ.e. sá valkostur að byggja við í Hlíðarstræti og færa allan leikskólann þangað og hinn að byggja lítillega við Lambhagann og færa alla starfsemina þangað. Sé horft til framtíðar og möguleikar á frekari stækkun teknir inn í myndina þá virðist ljóst að betri kostur væri að færa alla starfsemina í Lambhaga fyrst og byggja þar við litla byggingu, sem fyrri áfanga. Í síðari áfanga yrði síðan byggð stærri viðbygging. Auk þess að hafa meiri stækkunarmöguleika þá væri verið að færa starfsemina nær grunnskólanum sem gefur aukinn sveigjanleika í starfseminni.
Bæjarstjórn telur ekki rétt svo skömmu fyrir kosningar að taka ákvörðun um stækkun eða nýbyggingu leikskólans þar sem ljóst er að samkvæmt þriggja ára áætlun sveitarfélagsins þá er ekki svigrúm til að ráðast í nýbyggingu fyrr en eftir árið 2011. Ljóst er að ef leikskólinn á að geta tekið við fleiri börnum en í dag þá er um að ræða framkvæmd sem kostar vart undir 100 m.kr. Bæjarstjórn leggur því til að á árinu 2011 verði unnin frumdrög að leikskóla á einum stað sem byggi á ítarlegri þarfagreiningu. Ákvörðun um nýbyggingu eða flutning verði síðan tekin í kjölfarið á þeirri vinnu.“
